Frytig!!!!!!!!
Juhui, endlich Wucheend. Das isch e langi, und schweri Wuche gsi....
Ha hüt s Gfühl, dass i nid gar do Chaotisch zwäg bi.
Hüt falts mer e chli lichter, mit Lüt umzgo. Wie normal isch es noni, aber eso isch es erträglicher. Villicht isch es will Wucheend isch?!?! Wer weiss? Uff all fäll gniess i de Dad richtig. Hüt zobe gang i in mi Basterum go wärkle. Ha s gfühl, dass chönt hüt öbbis werde. Sett jo scho langsam dra. Am Sunntig sett i jo öbbis chöne abiete. E leere Märtstand gseht scho chli gspässig us :-)
Ha eifach gerkt, dass i mit dere Lune, wo i in letschter Zit ha, eifach nid Kreativ cha si. I fang zwar öbbis a aber es isch kei Füür do und ohni das innere, kreative Füür chasch es grad si lo. Den chasch mache was wilsch, es wird nid besser. Im gegeteil, den fang mi afo närve und wird agressiv....
Aber für hüt, hani e guets gfühl....

Stand der Dinge...Donnschtig, 28.11.2013

Immer wenn i s Gfühl ha, dass es nümi witter abe got, belert eim s Läbe besser....
I ha d Empfindig, dass es demnächscht e riese Knall mues gä. I halt dä Druck nümi us!!!!!!
I cha nümi normal due. Mit em EA isch es am schlimmschte. Wenn i nur scho si Stimm ghör, chrampft sich alles in mir zäme und i cha mi ihm gegeüber nid normal verhalte.... Es gspröch mit ihm au Gschäftlich, wird zumene Kampf, das i aständig blib. Er cha jo nüt derfür, dass es mir so go (emmel nid nur). I cha ihm au nid in d Auge luege und mini Gedanke schalte uf Durchzug wenn er öbbis seit. Wenns den ums Gschäft got, muess i mi richtig zämerisse, das i au versand was er seit. Es isch wie sini Wort eifach an mir abpralle würde. DAS ISCH DOCH NID NORMAL!!!!!!!
Au hani vill s bedürfniss öbberem azlüte und z schwätze. Wenn i das den aber mach, bin i wie Blockiert und wünsch mer i hät nid aglüte. I weiss den nid was schwätze und wenn i den doch was verzell, isch es immer Negativ oder i mach öbber abe.
Mi B cha au mache was er will, i chum eifach nid us minere Starri use.
Mengisch isch wie wenn i mi selber beobacht. Denn gseh i e chalti, unlidigi Person, wo an andere nur s negative gseht und au gross mues unterstriche.... I cha den die Person nid usstoh und si isch mer so fremd. Derbi bin ichs!!!!! Aber i gspür mi nid....i bi wie e Roboter....
Lache isch scho bald e Fremdwort, nüt find i luschtig und wenns öbber luschtig het wird i hässig und agressiv.
Mi B wett mi ammigs ufheitere und verzellt irgend e Filmusschnitt oder macht öbber noche....und ich stoh do wie e Pflock und cha nid reagiere, es chunt eifach nid a bi mir. Und den wird i sauer, meischtens uf mi selber und den Blockier i total. Fang afo in mi Loch z starre und bi uf dr Flucht vor mir selber.
Klar das das bi mim Gegenüber nid guet achunt.
 I WEISS ABER NID WIE ICH DO USE CHUM!!!!!!!!!
Mer hei do ei Obe e Serie gluegt und für e churze Zit isch es fascht wieder normal gsi, das het eifach nur guet do. Aber dr Fernseh ab und alles holt eim wieder i.
DAS CHAS EIFACH NID SI!!!!!!!!!!!
I ha echt Angscht was do uf mi zue chunt mit dere Therapie und allem drum und dra......aber i wir drum kämpfe, das mi B und ich wieder Glücklich chöne si!!!!!!!!!!!!!!!!!
I will mis (euses) Lebe wieder zrugg......

Scho wieder Mittwuch....Zit rasst, dass isch nümi normal....
Hüt isch wieder so e Dag, wo i chönt Stundelang Löcher in d Luft starre. I ha null Motivation. Jedi bewegig isch absoluti überwindig. I muess mi richti zur Konzentration zwinge. Vorher het mer dr EA e Vortrag über Flugzüg ghalte...es interresiert mi null und nüt. Das chasch au säge, nützt aber nüt. Do wirtsch eifach überhört und den chunt er total ins schwärme und cha nümi höre. Er merkt nid emol, dass ich ganz neume Andersch bi und ihm gar nid wirklich zuelos. Es isch jo au absolut spannend, welle welles Flugi entworfe und welle die ganze Plän umgschribe het.....wenns öbber wirklich interresiert!!!!!!!!!  Dr EA hät jo eh alles besser gmacht, wenn me ihn glo hät....und dass er als Chind Stunde und Tagelang uf em Flugplatz gsi isch und Flugi beobachtet het. Wers brucht...... Aber dört wett i im Moment au lieber si.....
Jetzt isch er gange und i fühl mi absolut erschöpft, kaputt und alles tuet weh.
Ha sit neuschtem no e riese Bolle am Hinterchopf. zwüsche Schädel und Gnick und de macht höllisch weh. Ha fascht nid chöne schlofe, den i cha nid wirklich druf ligge und den isch es uf minere schlofsitte :-( I denk das isch so e riese Pickel wo sich dört usbreitet und dr ganzi Chopf zämezieht.....
Echt im Moment fühl ich mi wie e Baustell überall fehlts und macht weh. I drei jetzt den dure!!!!!!!!!
Jede Tag chunt öbbis anders. I trau mi scho bald niemerem me dervo zverzelle. Mi B wird sich au langsam froge.... I bi eifach nümi normal.....!!!!!!!!!!!!!!!!!!!!!!!!!!!!!! Die ganzi Situation isch nümi normal!!!!!!!!!!!!!!!!!!!!! I ha so was vo gnueg, i verstick langsam in mir selber!!!!!!!!!!!!!!!!!

Sunne!!!!!! Hallo hüt schient, sitt langem wieder emol d Sunne.... Oh, das duet so guet und natürlich isch mi B wieder zrugg vo sinere Reis. Das isch natürlich s töllschte!!!!!
Nach dem Wucheend chas jo nur no besser werde :-)
Ha am Frytig zobe den nomol e gspröch mit em EA gha. Wo er vom Transport zrugg cho isch, het er nomol mit mir welle rede. Mer hei den no lang diskutiert und ich ha ihm den au gseit was mit mir los isch. Er het den gmeint er hebi scho gmerkt, dass öbbis nid stimmt. Ich sell doch ammigs früecher über so öbbis schwätze. Ha mi den nur gfroggt wenn? Zwüsche sine Hasstyrade gege sämtlichi Agstellte oder zwüsche de Bricht vo sim Gsundheitszusand?
Jetzt weiss ers uf all Fäll. I weiss noni ob das e gueti Idee gsi isch, aber de Frytig isch eso emotional gsi, das er mir eifach use grutscht isch.
I denk aber das es Fair isch, das ich ihn informiert ha. Jetzt weiss er worah er bi mir isch und das mini Lune nid wirklich kontrollierbar si. Er cha sich jetzt au sini Gedanke mache, wie er in Zukunft will witter mache. Es mues ihm au bewust werde, dass ich nümmi so wird si wie vorher. Entweder cha er mit dem Läbe oder suscht müesse sich unseri Weg halt wirklich trenne.
Mi Chopf seit jo scho lang, dass es s richtige wär, aber mi Gwüsse und mi Verantwortigsbewustsi chunt mer immer no in Queri......
Weiss dr Teufel wieso ich immer no s Gfühl ha, ich sigg ihm das schuldig?!?!

Was für e Dag!!!!!!!!!!!!!!!!!!! Ha hüt e Gspräch mit em EA gha.....und er hets gschafft, dass ich mi wieder schuldi fühl. Ich bi schuld an dr miese stimmig im Moment. Er macht jo alles um mi Arbetsplatz zerhalte und i bi jo so undankbar..... Er verzichtet uf alles damit es mir guet got. Er frogt mi jo jede Dag wies mir got, es sig im wichtig, dass es mir guet got. Aber wenn er das frogt wartet er nid wirklich uf e ehrlichi Antwort sonder verzellt, wie schlecht er hüt wieder gschlofe het......
Er het jo au mitbecho, dass i in de letschte Wuche mehreri Arzttermin gha ha, het aber nid einisch gfroggt was los isch.....Sovill zu mich Interresiert jo so wies Ihne got?!?!?!!!!
Mir isch klar, dass er sehr villi eigeni Problem het. I ha ihm au immer versucht so vill wie möglich abznäh.... aber einisch isch Schluss!!!!! I bi doch do nid dr Depp vom Dienscht.
Alles hetz so agfange, das ich ihm hüt morge e patzigi Antwort gä ha, nach dem er mir wieder öbbis gfroggt het wo ich ihm 5 Minute vorher erklärt ha und er mir wieder emol nid zueglost het....
De het er mi zur red gstellt was los isch, dass ich ihm immer eso patzig chume, öb i e Problem mit öbbisem heg. Den han ich ihm halt gseit, dass ich nit erscht gno wird und eifach regelmässig überhört wir. Das isch aber alles nid wohr und usserem heg er wichtigeri Problem....und scho het er wieder vom P und R agfange und das alli ihn immer usnütze. I han em den gseit, dass i nid all Dag will ghöre, dass i die Beschti und töllschti bi aber wenigschtens so vill wert bi das me mi ernscht nimmt.
I han em den au s Bischbil verzellt, was mi unheimlich verletzt het. I has 10Jöhrige gha. I ha nid wirklich öbbis erwartet aber grad gar kei Reaktion, kei Danke , kei dra dänke, me isch eifach unsichtbar. 2 Monet spöter het dr Männlichi Mitarbeiter Geburtstag gha, Den isch gross uftreit worde es het Raclette und Chueche gä, Gschänkkli und ei Tamtam. Frau Fasler chönne sie no e Dekoration mache...... Oh hani gmacht, 1 Monet spöter het dra nderi Mitarbeiter Geburtstag gha, das selbe Tam Tam nomol..... Und den frog ich mi, ob i nid s recht ha, ganz e chli bitzeli Apisst z si.
Ha ihm hüt morge gseit, dass mi das echt möge het. Den seit er doch, "I ha minere Frau verbote so öbbis z mache, i ha gwüsst das git nur böses Bluet.Aber die zwei sind halt wichtigi Mitarbeiter gsi und i ha grossi Hoffnige uf se gha..... "Den ha ich ihn gfroggt " und Sie wundere sich, dass ich mi do wie s letschte Arschloch fühl" Und er "Ja wenns Ihne do nümmi passt müen si halt go....."

So also, ha de Termin überstande....
Isch zerscht e chli doof gsi....ha müese warte und es isch Musig gloffe und mit dr Musig si mini Träne in ströbe gloffe. Das Wartezimmer het so öbbis entspannends gha und mit dere Klaviermusig hets mi grad gno.....aber nachher isch e grosse Teil vo dere Aspannig weg gsi. Bevor i ihne bi, isch mer ganz schlecht gsi vor aspannig.
Dr Döckti selber isch e eigene Typ. Eigendlich sehr sympatisch und e chli Öko :-)
Isch gar nid eso eifach was er do gmeint het....
Nach dem er mir sini Lebensgschicht verzellt het, han ich ihm mini verzellt.
Grundsätzlich isch mis gröschte Problem, das ich mi selber nid cha akzeptiere, liebe und mir nid wirklich vill zuetrau. Vor allem aber Selbschtliebi und Selbschtverantwortig isch für mi e Fremdwort. Ich müesi au lehre e gsunde Egoismus z entwickle ohni dä gosch uf dere Welt hoffnigslos unter. Es isch toll wenn me zu andere luegt, aber erscht wenns eim selber guet got. Suscht chasch gar nüt witter gä. Wenn me sich selber nid liebt cha me au anderi nid bedingigslos liebe...Päng, de het gsässe.....
Das isch eigendlich erscht e Kennelehrgspräch gsi und er het mer scho e paar deftigi Sache an Chopf gworfe..... isch jo au guet, suscht chunts bi mir jo eh nid a.
Au mues i lehre entscheidige selber z träffe und vor allem im mim Interesse. Chopf und Herz selle zämme lehre kommuniziere. Jetzt han ich d Wahl wies witter sell go.......
Will i witterei Termine bi ihm? Wenn i bi ihm witter mach, welle Weg? Medikament jo oder nei? Bewegigsterapie jo oder nei? Chrank schribe jo oder nei? Wenn jo wie lang und in weller Form? Was mach i im Gschäft? Blibe und e neue Weg versueche, tabula rasa und Chünde oder s Herzbluet total abzie us dere Firma und warte bis mir kündet wird?
So villi zur Uswahl.....und ich muess entscheide welle Weg i sell go.... Dr Chopf weiss es sco lang, aber s Herz isch noni so witt....
S Gspräch isch au no uf mi leibliche Vatter cho.....Do het er mir e sehr interessanti Frog gstell, wo ich mir selber ehrlich sell beantworte: "Wenn Sie Totesazeig mit em Name vo Ihrem Vater würdet lese, hätte Sie den s Gfühl öbbis verpasst z ha?" Do hani ganz ehrlich müesse säge jo.... Denn frogt er mi doch ; "uff was warte si den?"
Gueti Frog, uf was wart i wirklich? Wahrschinlich, dass er dr erscht Schritt macht und mir wieder emol e entscheidig abgno wird....................

Wow, hüt isch es sowit.... Ha mi erschte Termin bim Dr. Burri....
Kei Ahnig was do uf mi zue chunt?!?! Ha mer grad überleggt, wie ich mi füehl. Wie me mi momentane Zuschtand chönti beschriebe.
Mir händ als Chin amigs e Spiel gmacht. E grossi Decki an Bode gleit und eins vo uns isch ganz satt igwigglet worde. I bi sälte das Chind in dr Decki gsi. I ha das ghasst, so satt igschlosse und kei mm chönne bewege. Ha den fascht Panik becho.....
Genau so fühl i mi jetzt mengisch ohni Decki.... E unglaublichi Starri wo um mi isch, fühl mi wie igschlosse. Und in mir drinne isch öbbis wo use will es chunt langsam richtig in Panik. Wie scho mol beschribe, wie e Dampfchochtopf vor em Explodiere.....
Das ganze isch so asträngend, dass i nachhär völlig kaputt bi und numme no wett in e Egge starre oder grad go schlofe.
Wenigschtens hei mir villicht e Antwort uf die Muskelschmerze gfunde.
Mi TCM Arzt het gmeint, dass die Muskelschmerze eventuell vom Chrampfe chöme. Er het mi gfroggt ob mir znacht scho uffgalle wäri, dass i mi verchrampf. I weiss aber nur, das ich absolut Chaotisch schlof, vill schwätz und dauernd in Bewegig bi. Mi B cha do e Liedli dervo singe.....
Es isch uff all Fäll nid sehr erholsam...
Au die Träum wo ich ha. Zum Teil total realistisch und i weiss, wenn i verwach nid, obs jetzt wohr isch oder wo i bi....
Ha au scho ganzi Nächt gschafft und am morge bin i gräderet gsi.
Mängisch isch au komisch, dass wenn i verwach und den witter schlof, dr glichi Traum au witter got.....und das mehreri mol.
I verwach vor allem ab mim eigene Geplapper. I schnur den so lut, das i selber verwach oder i schnur mit einer Überzügig an mi Arme B ane und bi überzüggt, dass i hell wach bi. Derbi schnur i e sone stuss, dass i nid wirklich wach und do bi. Bi aber völlig Überzüggt, so sehr , dass i no verruckt wird wenn mi B seit; "Du Schlofsch jo no........Schlof witter"

Neue Dag, neus Laber ;-)
S Wetter isch nid wirklich besser....Nur das de Deckel vo geschter, langsam als Rege vom Himmel gheit.
Ha grad miteme Chund gschwätzt, er isch letscht Wuche no in Hawaii gsi. Netti 25-28 Grad und immer e Windli...genau mini Temperature für d Ferie. Nid z heiss und doch nett warm.. Er isch au no uf ere Insle gsi 37 Grad kei Windli und gfühlti 250% Luftfüechtigkeit, das macht eim jo kaputt. Do hesch jo s gfühl das de e Fisch bisch und Wasser schnufsch , dass mues jo gurgle bi jedem lufthole :-)
Hüt hani au fascht Ferie, dr EA isch unterwegs und i ha hüt nomitag Sturmfrei. Kei Laber und kei negativi Strahlig....es goht mer richtig guet.
Villicht liggt mini ganzi Chrankegschicht jo wirklich an einer Sach. Bi jetzt scho so mäng Johr do agstellt und wahrschinlich het sich das Ganze in all dene Johr summiert und agstaut. Wenn i so zrugg denk, setts mi eigendlich nid wundere wenns emol e Chlapf git. Me cha nid immer uf s Mul hocke, alles schlucke und jede Dag wieder go schaffe unds alle recht welle mache.
Do muesch über churz oder lang dr chürzer zie. Dr Körper isch wirklich e Wunderwerk, wenn er gnueg het zieht er eifach d Notbrems. Jetzt liggts an mir die Zeiche au ernscht z nä. Ha eifach no kei ahnig wie. Cha jo au nid alles ane gheie......
I ha mer das jo au selber Ibrockt, es liggt nur an mir, dass ich in gwüsse Situatione so reagier. I muess zerscht an mir selber öbbis ändere bevor sich in mim Umfeld öbbis cha ändere. Suscht lauf i jo grad wieder ins gliche Muschter... Eifach wir das nid wärde aber i nimm die Herusforderig a!!!!!!!!!!!
I merk nämlich langsam, dass i doch öbber bi und i mi nümi mues verstecke.....
Bi gspanne was dr Döckti morn meint.

Hüt isch e Dag.....s Wetter het sich verabschidet.... Dr Himmel hangt bis uf Stross abe. Me muess immer Angscht ha, das er eim entgüldig uf e Chopf gheit. Die ganzi Gegend isch untereme Deckel und es wird nid wirklich Dag hüt. Mini inneri stimmig het sich em Wetter apasst....so gsehts au grad öbbe in mir us. Gescher bin i fascht platzt vor Deubi und hüt chönsch mi in e Egge stelle und i würd bewegigslos stoh blibe und in Nebel luege......Aber schaffe sett i jo au noch chli :-)
Obwohl im Moment lauft wieder überhaupt nüt. D Arbet muesch dr gwaltsam sueche. Bi wieder emol churz vor em Früehligsputz. Eifach nur damit i Zobe s gfühl ha, dass i doch au no öbbis gmacht ha was me gseht.
An so Däg chöntsch die glatte Wänd uf, kei Telefon, kei Arbet und dr ganzi Dag dr Chef gegeüber.
Do wird jede wo je bi ihm gschafft het dureghächlet und als A-loch, Betrüeger und S-Hund beschimpft.....sie alli hei sini Firmene mit Absicht zerrstörrt.....I will eifach hei!!!!! Es chunt ihm nid ei Sekunde in sinn, dass er au chönti e chlini schuld dra ha, dass sini Firmene Bachab gön. Aber nei alli andere si tschuld. Er het immer nur Krampfed und allne Agstellte jede Wunsch vo de Auge glese...... Ibildig isch au e Bildig. Er het se eifach mache lo....ohni füehrig und ohni Plan und ohni das je e Agstellte gwüsst het was er eigentlich will. Immer erscht wenn`s brennt het, isch ihm in Sinn cho, das es jo sini Firma isch. Denn isch aber meischtens scho z spot gsi und wer isch tschuld gsi?!?! Immer irgend e Agstellte. I ha vorher Firmene gschribe, dass isch kei Schribfehler, dass isch scho mehreri mol passiert.....

Mentigmorge.......
Das isch e verruckts Wucheend gsi.... I bi im Moment echt unusstehlich!!!!! I ha mini Gfühl eifach nümi unter Kontrolle. Mengisch chum mer vor wie e Geischt. Me gseht mi zwar aber bi nid wirklich awäsend. Das sin söttigi Moment wo für`s Umfeld unheimlich si. I starr vor mi ane und reagier uf nüt me. Das isch für mi B. absolut hässlich, i weiss aber i cha nüt drgege mache. Im Gegeteil, i wett den gar nüt drgege mache, denn i fühl in dene Moment gar nüt. I denk sogar mängisch gar nüt. Es isch wie e inners Leere. Für mich es guets gfühl aber für mi Umwelt wahrschienlich licht unheimlich.
Natürlich isch das nid normal, dass isch mir au klar aber was sell i mache? Ha fascht echli dr Idruck, dass das e flucht vor mir selber isch, dass i mich den mit nüt und niemerem muess usenander setze.
Das sell nid falsch verstande wärde. I lieb mi B. und bi ihm unendlich Dankbar, dass er so vill Geduld het mit mir. I hass mi mängisch au für mini reaktione ihm gegeüber aber i cha eifach nid us minere Hut. Es reagiert automatisch wie wenn ich`s gar nid wäri und den isch es scho gseit oder gmacht.....und i cha nümi zrugg.....

Bi scho wieder do :-)

Mues jetzt eifach schnell chli Dampf ablo.... Ich explodier jetzt den grad....aber wahrschienlich bi ich au für das no z fuhl.....chönt nämlich grad im stoh ischlofe....
Aber dr EA laberet mi sitt er do isch voll!!!!!! Mit allem wo mi nid Interresiert!!!!!!!!!!!!!!!!!!!
I vertrag dr EA eifach nümi. Hüt isch es bsunders schlimm. Er cha säge was er will, i chönt en an e Wand klatsche. Er merkt, bi sine stundelange Monologe nid emol, dass ich ihm gar nid zuelos. Au het er wieder politischi Rede gschwunge. I ha den mol versuecht öbbis an dere Unterhaltig biztrage und e Thema wo isch nid glicher meinig bi, e andere Denkasatz z bringe aber chasch vergesse. Er weiss es besser und nur si Meinig isch richtig. Do muesch jo s gfühl ha das de e Volldepp bisch.
Sini Frau isch jo au so e gschiedi, nur si cha choche alli andere hei absolut kei ahnig vo dem Metier...... Vor allem nid de Koch wo näbe dra wohnt, dä isch e absolute Depp, was choche abelangt und überhaupt isch er e Dubel!!!! Sini Frau het emol Coiffeuse glehrt do weiss me scho wies inere Beizechuchi z laufe het. Selber traut er ihre nid emol zue, elei go Ichaufe oder suscht e Entscheidig z träffe, nei sie muess zäh mol im Tag alüte und um sini Meinig froge. E wunder das si selber darf entscheide was si alegge will....obwohl wer weiss?!?!?!! Er het ere au scho gseit, das si agleggt isch wie e Vogelschüchi.....Er het jo au scho mol zunere Fründin gseit; wenn Du de Nagellack nid weg machsch, nimm di nid mit..... Dä hät i in hohem Boge vor Türe gstellt.....
Das het jo mit mir gar nüt zdue....nervt aber glich...
Ha au dr Vortrag: alli Agstellte sind Bandite wieder dörfe lose. Er wird sitt dass er sebständig isch vom Personal nur versecklet, usbüttet, verarscht und betroge.....I chas nümi ghöre!!!!!!!!!!!!!!!!!!!!!!!!!!!!!!!!!! I BI AU AGSTELLT!!!!!!!!!!!!!!!!!!!!!!!! Isch ihm egal, er seit nur "Si wüsse jo wie ich das mein, das betrifft sie nid" Doch das betrifft mi au.... Das macht me eifach nid!!!!!!!!!!!!!!!
I ha mer jetzt sit 12 Johr in dere Firma dr A.... ufgrisse, han em alles ane g.... gha, immer guet Wetter gmacht und ihm alles welle recht mache.....es isch nid möglich.... I ha mi selber zur Sau gmacht derwege und jetzt?!?!??? Wird mer langsam alles total egal....Si gutwill bedütet mer nüt me...er nervt nur no... I ha kei respekt me vor ihm. De hani spötischten den ganz verlore, sitt er vor mir furtzt, gorbst und ohni hemmige in dr Nase poplet....wie wenn i nid do wär. Bim niesse mues me au d Hand nid vor s Mul hebe, me cha alles uf sämtliche Monitore, Tastature und Arbetsblätz verteile aber vor allem nid an sim eigene Platz....es isch eifach grusig. Wenn de was seisch, oh exgüsi ha grad kei Hand frei gha zum vorne dra hebe (er hebt beidi bim niese nach hinde, wie wenn er grad wett furtfliege und findets sau luschtig......)
Und es isch nid so das mer Busefründe wäre, nei, mir sin immer no per Sie au nach 12 gmeinsame Johre, wo mir jo "ach so vill zäme duregstande hei".....wie er immer betont.... Eigentlich isch mer das Sie ganz recht. Es het eifach e chli e komische Idruck gmacht, dass anderi Agstellti wo no kei Monet bi uns gschafft hei (natürlich Männer) mit ihm per Du si...aber au das S...egal ;-D
So jetzt gots mer e chli besser...ok er isch au nümi do ;-) aber dr Druck het chli noche glo....
Danke dass ich do dörf ablade......

Also....do bin i jetzt und versuech mi als Blogger :-)

Ha grad es Telefon vom Herr Burri becho....er tönt nett und ganz sympatisch......
Ha am nächschte Dunnschtig dr erschti Termin. Bi echt gspanne und au chli nervös.
Was chunt do uf mi zue? Isch mer jo au klar, dass es eso nümmi witter got.....
Gsundheit isch wirklich s choschtbarschte wo me het und me sett se nid ufs Spiel setze. Eifach gseit......i weiss, aber do mues i jetzt dure. Das bin ich mir selber schuldig!!!!!!!!!
I ha e Schritt in e ganz neui Richtig gmacht und i wünsch mer, dass mi dr Muet witter z go, nid verlott.... Veränderige hei mit Schmärze zdue und ich gspür se nit nur uf dr seelische sondern au uf dr körperlich Ebeni. Es macht eim angscht wenn dr Arzt seit, si sin Kerngsund (was jo e super Nachricht isch, das wett i nid abstritte) aber me sich Körperlich wie es Frack fühlt. Bi jedem Schritt macht eim dr Körper weh als wenn me e Grippe hät. Zwei stägetritt oder au scho uf dr grade schnell laufe, und me schnuft wie e Dampfwalzi und s gfühl kei Luft me zbecho isch himmeldrurig.
Aber gnueg gjomeret für hüt....

Das ist bereits mein 2. Eintrag

Mein Typ ist ja so was von originell :D

Mein erster Eintrag

Hallo liebes Tagebuch...