Scho wieder Mentig und e ganzi Wuche nüt gschribe. Isch echt e strubi Wuche gsi. Voller Selbschzwifel, Selbschtvorwürf und vor allem vill Selbschtmitleid. Ei Tiefpunkt nach em andere....und am Frytig dr Termin bim Dr.B. Was seit er?!?!?! Ich schribb Sie für mindeschtens 4 Wuche chrank und sie gön in Kur. Päng do hesch.... Wenn si nid endlich d Notbrems ziehn fahre sie direkt in e Burnout..... Wüsse Sie, d Antideresiva sind hüt au nümi so schlimm wie früecher, einzig es chönt Ihne dauernd schlecht si, gfülsmässig chunt nümmi so vill an se ane (was jo nid nur e Nochteil isch) und dr Stoffwechsel fahrt uf s Minimum abe...also rechne sie mit ere grössere Gwichtszuenahm... NEI BITTE NID NO ME!!!!!!!! I ha in de letschte 1 1/2 Johr scho 20 Kilo zuegnoh!!!!!! ES LÄNGT JETZT!!!!!!!! Und den die netti Frog wo er mir zum überlegge, bis zum nächschte mol, no mitgä het: Finde sie use was genau haltet sie an ihrem Arbetsplatz?
Do gits einigi Antworte.....ha aber gmerkt, dass keini vo dene Antworte s wert isch gsundheit uf s Spiel z setze.

So schnell gots und scho isch wieder Mentig.....
Het mi echt überwindig koschtet hüt am morge ufzstoh. Ha e schöns Wucheendi gha. Ha fascht kei Zit gha, mich mit mir usenander z setze. Isch immer öbbis gange. Geschter hei mer Wiehnachtsmärt gha und mini Sache sind echt guet glufe, ha richtig freud gha. S Mami isch au derbi gsi und sie het au super guet verchauft. Es isch zwar A-chalt gsi aber wenigschtens troche. D Sunne isch au zwüsche dure füre cho aber Bise isch echt chalt gsi. Zobe wo mer ine sind, hei eusi Backe glüchtet wie e Stalllampe :-) (aber nid nur vo dr Chälti)
Es isch wirklich e schöne Dag gsi. Ha au vill Lüt vo früecher wieder troffe und feschtgstellt. dass nid nur ich älter wird :-)